काठमाडौं । हिन्दू धार्मिक परम्पराअनुसार हप्ताको प्रत्येक दिनलाई कुनै न कुनै देवी–देवताको पूजा–आराधनासँग सम्बन्धित गरिएको छ । त्यसैगरी शुक्रबारलाई विशेष गरी धन–समृद्धिको देवी लक्ष्मीको पूजा गर्ने दिनका रूपमा मानिन्छ ।
धर्मग्रन्थमा उल्लेख भएअनुसार लक्ष्मीको आराधना गर्ने व्यक्तिले जीवनमा धन, ऐश्वर्य र समृद्धि प्राप्त गर्ने विश्वास रहँदै आएको छ । शुक्रबार बिहान वा बेलुकी घर–आँगन सफा गरी दीप प्रज्वलन, धूप–बत्ती अर्पण गरेर लक्ष्मीको पूजा गर्ने चलन छ । यसरी लक्ष्मीलाई प्रसन्न पार्दा घरमा आर्थिक अभाव टर्ने, व्यापारमा लाभ हुने र परिवारमा सुख–शान्ति कायम रहने जनविश्वास छ ।
शुक्र ग्रहसँग सम्बन्धित भएकाले यस दिन व्रत बसेर वा लक्ष्मी स्तोत्र, शुक्र मन्त्र जप गर्नेले दाम्पत्य सम्बन्धमा मधुरता बढ्ने, प्रेम र सामञ्जस्य कायम हुने फल प्राप्त गर्ने विश्वास छ । ज्योतिषीय दृष्टिले शुक्र बलवान हुँदा जीवनमा कला–सौन्दर्य, वैभव र आकर्षण बढ्ने भएकाले शुक्रबारको पूजा अत्यन्त लाभदायी मानिन्छ ।
त्यसैगरी, नेपाली समाजमा शुक्रबारलाई सन्तोषी माताको व्रत गर्ने दिनका रूपमा पनि विशेष महत्व दिइन्छ । यस दिन व्रत बसेर गुड र चनाको प्रसाद चढाइन्छ र दिनभर नुन नखाने परम्परा छ । धार्मिक आस्थाअनुसार यस व्रतले इच्छापूर्ति हुने, परिवारमा सन्तोष बढ्ने र विघ्नबाधा टर्ने जनविश्वास छ ।
