काठमाडौं
टिकटकमा चर्चित इराकी महिला गुफ्रान सवादीको गोली हानी हत्या गरिएको छ । राजधानी शहर बगदादस्थित उनको आफ्नै घरबाहिर उनको गोली हानी हत्या भएको हो । टिकटकमा उनी उम्म फहाद नामबाट चर्चित थिइन् ।
घटना जायुना क्षेत्रमा भएको थियो जुन बगदादको पूर्वमा पर्दछ घटनालाई सीसीटीभी क्यामेराले भिडियोमा कैद गरी सामाजिक सञ्जालमा सेयर गरिएको सीएनएनले जनाएको छ ।
मोटरसाइकलमा सवार बन्दुकधारीले गोली हानेर सवादीको घटनास्थलमै हत्या गरेको भिडियोमा देखिन्छ । बगदाद प्रहरी स्रोतले भिडियोको प्रामाणिकता पुष्टि गरेको छ ।
सवादी टिकटकमा निकै लोकप्रिय थिइन् । उनी फिटिङ पहिरन लगाएर पप संगीतमा नाचेको भिडियो सेयर गर्थिन् । विगतमा यी भिडियोलाई इराकको न्यायपालिकाले अनुचित मानेको थियो ।
अश्लील र अभद्र भाषाको प्रयोग गरेको, सार्वजनिक शिष्टता र नैतिकताको उल्लंघन गर्ने धेरै फिल्म र भिडियो निर्माण गरेको भन्दै सवादीमाथि ६ महिनाको जेल सजाय सुनाइएको थियो । अन्य इराकी सामाजिक सञ्जालका स्टारलाई पनि आक्रमणका घटना भएका थिए ।