सहिद स्मारक ‘सी’ डिभिजन लिगमा स्पोर्टस् एकेडेमी साँगाले दोस्रो जित निकालेको छ । सातदोबाटोस्थित एन्फा मुख्यालयमा साँगाले बिहीबार रानीवन स्पोर्टस् क्लबमाथि १–० को जित निकालेको हो । साँगालाई जित दिलाउन टीकाराज गुरुङले ५६औँ मिनेटमा निर्णायक गोल गरेका थिए ।

पहिलो हाफमा दुवै टोलीले उत्कृष्ट प्रदर्शन गरे पनि गोल गर्न सकेनन् । साँगाले पहिलो खेलमा झम्सीखेललाई १–० ले पराजित गरेको थियो । जितसँगै साँगाले तीन खेलमा ६ अंक जोडेको छ । साँगा दोस्रो खेलमा मनोहरा युनाइटेड युथ क्लबसँग ३–२ ले पराजित भएको थियो । रानीवनको यो पहिलो हार हो । पहिलो खेलमा महावीरसँग १–१ बराबरी खेलेको रानीवनले दोस्रो खेलमा समाज कल्याण खेलकुद केन्द्रसँग गोलरहित बराबरी नतिजा निकाल्यो । रानीवनको तीन खेलबाट २ अंक छ ।

ad

पुल्चोकले झम्सीखेलमाथि ४–१ को सादार जित निकाल्यो । पहिलो हाफको ४५ मिनेटसम्म १–० ले अगाडि रहेको झम्सीखेलले मध्यान्तरपछि राम्रो खेल्न सकेन । पुल्चोकले लगातार तेस्रो जित निकालेको हो । पुल्चोकका सिरब तामाङले दुई गोल गरे । मदन पौडेल र समिप ढकालले समान एक गोल गरे । झम्सीखेलका लागि ओम धामीले एक गोल फर्काए । जितसँगै पुल्चोकले तीन खेलबाट ९ अंक जोडेको छ । झम्सीखेलको समान खेलबाट ३ अंक छ । यसअघि पुल्चोकले सामाजिक युवा क्लबलाई ३–० र स्वयम्भू क्लबलाई २–१ ले पराजित गरेको थियो । झम्सीखेल पहिलो खेलमा स्पोर्टस् एकेडेमी साँगासँग १–० ले पराजित हुँदा दोस्रो खेलमा गोलबजार स्पोर्टस् क्लबलाई ४–० ले हराएको थियो ।

खेलको १८औँ मिनेटमा झम्सीखेलले ओमको गोलबाट अग्रता बनाएको थियो । पहिलो हाफको इन्जुरी समयमा मदनले खेललाई बराबरीमा ल्याए । सिरबले पेनाल्टीमा गोल गर्दा पुल्चोक २–१ ले अगाडि रह्यो । इन्जुरी समयमै झम्सीखेलका अनिश नेपालीले रातो कार्ड पाएपछि झम्सीखेल दश खेलाडीमा सीमित भयो । खेलको ५१औँ मिनेटमा सिरबले व्यक्तिगत

दोस्रो तथा टोलीका लागि तेस्रो गोल गरेका हुन् ।