इरान युद्धका क्रममा कायम गरिएको नाजुक युद्धविराममाथि फेरि गम्भीर प्रश्न उठ्ने गरी कुवेतले बिहीबार आफूमाथि मिसाइल र ड्रोन हमला भएको जनाएको छ। अमेरिकाले इरानविरुद्ध आफ्ना आक्रमणहरू तीव्र बनाएको र तेहरानले त्यसको कडा प्रतिकार गरिरहेको दाबी गरिरहेका बेला यो नयाँ घटना सार्वजनिक भएको हो।
कुवेती सेनाले संक्षिप्त घोषणा मार्फत आक्रमणको पुष्टि गरे पनि कुन स्थान वा संरचनालाई निशाना बनाइएको थियो र यसको जिम्मेवारी कसले लिएको हो भन्नेबारे तत्काल कुनै विवरण सार्वजनिक गरेको छैन। यो घटनाले युद्धको अवधिभर इरान तथा इराक क्षेत्रका इरानसमर्थित शिया मिलिसियाबाट बारम्बार जोखिममा पर्दै आएको कुवेतको पुरानो सुरक्षा चिन्तालाई पुनः जीवित गराइदिएको छ।यो सैन्य तनाव तेहरान र वासिङ्टनबीच युद्धविराम कायम राख्ने प्रयास र जारी कूटनीतिक वार्ताका बीच सतहमा आएको हो।
कूटनीतिक प्रयासहरू भइरहे तापनि विश्व ऊर्जा आपूर्तिका लागि अत्यन्त संवेदनशील मानिने स्ट्रेट अफ होर्मुज जलघाँटी अझै पनि पूर्ण रूपमा सञ्चालनमा आउन सकेको छैन। पर्सियन खाडीको साँघुरो प्रवेशद्वारका रूपमा रहेको यस जलमार्गबाट कुनै समय विश्वव्यापी तेल तथा प्राकृतिक ग्यास व्यापारको करिब पाँचौँ हिस्सा ओसारपसार हुने गर्दथ्यो।
हाल यस क्षेत्रमा सिर्जित अवरोधले अन्तर्राष्ट्रिय ऊर्जा आपूर्तिमा गम्भीर असर पारेको छ, जसका कारण विज्ञहरूले आगामी साताहरूमा विश्वभर ऊर्जा अभाव अझ चर्किन सक्ने चेतावनी दिइरहेका छन्।पछिल्लो समय अमेरिकाले इरानमाथि उच्च स्तरमा संवर्धन गरिएको युरेनियमको मौज्दात पूर्ण रूपमा त्याग्न चौतर्फी दबाब दिइरहेको छ।
अर्कोतर्फ, इस्लामिक गणतन्त्र इरानले आफूमाथि लगाइएका कडा आर्थिक प्रतिबन्धहरू हटाउन तथा विभिन्न देशमा रोक्का गरिएका आफ्ना सम्पत्तिहरू फुकुवा गराएर कमजोर बन्दै गएको राष्ट्रिय अर्थतन्त्रलाई राहत दिने दाउमा छ।
यही रणनीतिक खिचातानीका बीच बिहीबार बिहान अमेरिकी अधिकारीहरूले दिएको जानकारीअनुसार अमेरिकी सेन्ट्रल कमान्डअन्तर्गतका फौजले स्ट्रेट अफ होर्मुज आसपास खतरा उत्पन्न गरिरहेका चारवटा इरानी एकतर्फी आक्रमणकारी ड्रोनहरू सफलतापूर्वक खसालिदिएका छन्।
