काठमाडौं । नेपाल कम्युनिष्ट पार्टी (एमाले)को नयाँ नेतृत्व चयनका लागि जारी महाधिवेशनअन्तर्गत मतदान प्रक्रिया सुरु भएको छ। अध्यक्ष पदका लागि वर्तमान अध्यक्ष केपी शर्मा ओली र वरिष्ठ नेता ईश्वर पोखरेल उम्मेदवार रहेकाले महाधिवेशनस्थलमा प्रतिस्पर्धात्मक माहोल देखिएको छ।
निर्धारित समयअनुसार मतदान केन्द्र खुलेसँगै प्रतिनिधिहरू उत्साहपूर्वक मतदानमा सहभागी भएका छन्। अध्यक्ष पदसहित पदाधिकारी र केन्द्रीय सदस्य चयनका लागि मतदान भइरहेको निर्वाचन समितिले जनाएको छ। पार्टीभित्र लामो समयदेखि देखिएको नेतृत्व परिवर्तन बहसलाई यो निर्वाचनले निर्णायक मोड दिने अपेक्षा गरिएको छ।
