हेटौंडा ।
मकवानपुर जिल्ला मनहरी गाउँपालिकामा बाघ मृत फेला परेको छ । मनहरी गाउँपालिका–६ प्रतापुर बस्ने बलबहादुर राईको गोठमा बिहान सवा ३ बजे बाघ मृत फेला परेको हो ।
गोठमा बाँधेको भैंसी घाइते अवस्थामा र भैंसी नजिकै बाघ मृतावस्थामा फेला परेको प्रहरी नायव उपरीक्षक लक्ष्मी भण्डारीले जानकारी दिए । डिएसपी भण्डारीका अनुसार बाघको मृत्युको कारण पत्ता लागिसकेको छैन ।
पर्सा राष्ट्रिय निकुञ्जको सुरक्षार्थ खटिएको मध्यवर्ती क्षेत्र पदमपोखरी सेक्टर लामिटार ब्यारेकका नेपाली सेनाका अनुसार बाघ बुढो देखिन्छ र भैंसीले हान्दा मृत्यु भएकोजस्तो देखिन्छ । तर मृत्युको कारण एकिन भइसकेको छैन ।
घटनास्थल चितवन राष्ट्रिय निकुञ्जको क्षेत्रभित्र पर्दछ । चितवन राष्ट्रिय निकुञ्जको सेनाको टोलीले मृत बाघ लगेर गएको छ ।
गोठभित्र पसेर भैंसी आक्रमण गर्ने बाघको मृत्यु