जुनेली मिडिया
काठमाण्डौ । सर्वोत्तम सिमेन्ट लिमिटेडको लक इन अवधि आगामी भदौ २५ गते सकिने भएको छ ।
उक्त कम्पनीले सर्वसाधारणलाई निष्कासन गर्न छुट्टाएको सेयरमध्येको सामूहिक लगानी कोषका लागि छुट्टाएको ५% ले हुन आउने १ लाख ५४ हजार २२७ कित्ता सेयर र योग्य संस्थागत लगानीकर्तालाई बाँडफाँड गरेको २४ लाख कित्ता गरी कुल २५ लाख ५४ हजार २२७ कित्ता सेयरको लक इन अवधि भदौ २५ गते सकिन लागेको हो ।
आम सर्वसाधारण्का लागि कम्पनीले निष्कासन गरेको आईपीओ २०८० फागुन २५ गते बाँडफाँड गरेको थियो । भदौ २५ गते उक्त साधारण सेयर बाँडफाँड भएको ६ महिना पुग्दैछ ।
साधारण सेयर बाँडफाँड भएको ६ महिनासम्म सामूहिक लगानी कोष र संस्थागत लगानीकर्ताका लागि छुट्टाइएको सेयर रोक्का रहने प्रावधान रहेको छ । यसर्थ भदौ २५ गते उक्त सेयरको लक इन अवधि समाप्त हुन लागेको कम्पनीले जनाएको छ ।
कम्पनीले जारी पूँजी ४ अर्ब ६५ करोड रुपैयाँको १२.९०३३ प्रतिशतले हुन आउने कुल ६० लाख कित्ता साधारण सेयरमध्ये ४० प्रतिशत अर्थात २४ लाख कित्ता योग्य संस्थागत लगानीकर्तालाई बाँडफाँड गरेको थियो । यस्तै कम्पनीले सर्वसाधारणका लागि निष्कासन गर्न छुट्टाएको सेयरमध्येको ५ प्रतिशत अर्थात १ लाख ५४ हजार २२७ कित्ता सेयर सामूहिक लगानी कोषलाई बाँडफाँड गरेको थियो ।