अविरल वर्षाका कारण जाजरकोटमा पहिरो जाँदा एक महिलाको दुःखद मृत्यु भएको छ भने दुई जनालाई जीवितै उद्धार गरिएको छ।
जिल्ला प्रहरी कार्यालय जाजरकोटका अनुसार असार २८ गते राति परेको भारी वर्षाका कारण भेरी नगरपालिका–२ राङ्सीमा पहिरो खसेको थियो।
स्थानीय जयशीला शाहको अस्थायी टहरामाथिबाट अचानक पहिरो खस्दा टहरा पुरिएको र उक्त घटनामा परी ६० वर्षीया जयशीलाको घटनास्थलमै ज्यान गएको प्रहरीले जनाएको छ।
टहरा पहिरोले पुरिएलगत्तै स्थानीय बासिन्दा र सुरक्षाकर्मीको टोली उद्धारमा खटिएको थियो। उनीहरूको तदारुकताका कारण पहिरोमा पुरिएकी जयशीलाकी ४० वर्षीया छोरी मेनुका शाह थापा र ७ वर्षीया नातिनी टिका थापालाई भने सकुशल उद्धार गर्न सफलता मिलेको छ।
