नेपाल र भारतबिच सीमापार रेलमार्ग परियोजनाहरूको प्रभावकारी कार्यान्वयन र द्विपक्षीय प्राविधिक सहयोगको समग्र समीक्षाका लागि परियोजना सञ्चालन समितिको १०औँ तथा संयुक्त कार्य समूहको आठौँ बैठक काठमाडौंमा सम्पन्न भएको छ।
जुन ११ र १२ (जेठ २८ र २९ गते) सम्म चलेको दुई दिने बैठकमा भारत सरकारको अनुदान सहयोगमा अघि बढिरहेका विभिन्न रेलमार्ग आयोजनाहरूको विस्तृत समीक्षा गरियो। भारतीय दूतावासका अनुसार यस बैठकमा मुख्यगरी जयनगर-बिजलपुरा-बर्दिबास र जोगबनी-विराटनगर ब्रोडगेज रेलमार्गको हालको प्रगति र भावी कार्ययोजनाबारे गहन छलफल भएको छ।
यस पटकको बैठकमा दुवै देशका नागरिकको धार्मिक तथा सांस्कृतिक सम्बन्धलाई थप प्रगाढ बनाउने बहुप्रतीक्षित जनकपुर-अयोध्या खण्डमा यात्रुवाहक रेल सेवा सञ्चालन गर्ने विषयले विशेष प्राथमिकता पाएको छ। सो खण्डमा चाँडै रेल सेवा सुचारु गर्न आवश्यक पर्ने 'मानक सञ्चालन कार्यविधि' (SOP) लाई अन्तिम रूप दिने सम्बन्धमा दुवै पक्षबिच सकारात्मक कुराकानी भएको छ।
यसका साथै, काठमाडौंलाई भारतसँग जोड्ने रक्सौल-काठमाडौं ब्रोडगेज रेलमार्गको 'अन्तिम स्थान निर्धारण सर्वेक्षण' (FLS) प्रतिवेदन, नेपालको पूर्व-पश्चिम रेलमार्गका लागि प्राविधिक सहयोग तथा अन्य सम्भावित नयाँ क्रस-बोर्डर रेलमार्गको सम्पर्क विस्तार गर्ने विषयमा समेत अधिकारीहरूले जोड दिएका छन्।
