ललितपुर महानगरपालिकाले रातो मच्छिन्द्रनाथको रथबाट नरिवल खसाल्ने दिन अर्थात् वैशाख १६ गते बुधबारका दिन महानगरभरि सार्वजनिक बिदा दिने निर्णय गरेको छ। यो ऐतिहासिक र धार्मिक महत्त्वको जात्रामा नगरवासीहरू सहजै सहभागी हुन सकून् भन्ने उद्देश्यले महानगरपालिका र त्यस अन्तर्गतका सबै कार्यालयहरू बन्द रहने जानकारी महानगर प्रमुख चिरिबाबु महर्जनले दिनुभएको हो।
गत वैशाख ८ गते पुल्चोकबाट सुरु भएको यो रथजात्रा गाःबहाल, मंगलबजार र सुनधारा हुँदै लगनखेल पुगेपछि त्यहाँ बलि पूजा गरिन्छ। त्यसको भोलिपल्ट रथको टुप्पोबाट नरिवल खसाल्ने पुरानो परम्परा रहेको छ। धार्मिक आस्था र संस्कृतिको सम्मान गर्दै महानगरले विगत तीन वर्षदेखि यो विशेष दिनलाई स्थानीय बिदाका रूपमा मनाउँदै आएको छ।
