नेपाल सरकारले हालै कार्यान्वयनमा ल्याएको हप्तामा दुई दिन (शनिबार र आइतबार) सार्वजनिक बिदा दिने निर्णयसँगै स्वास्थ्य सेवामा पर्न सक्ने प्रभावलाई ध्यानमा राख्दै स्वास्थ्य मन्त्रालयले नयाँ कार्यविधि सार्वजनिक गरेको छ। यो व्यवस्था अनुसार अब सरकारी अस्पतालका ओपिडी (OPD) सेवाहरू आइतबार बन्द रहनेछन्। यद्यपि, अस्पतालमा भर्ना भएका बिरामीहरूको हेरचाह गर्ने 'अन्तरङ्ग' सेवा र आकस्मिक अवस्थाका बिरामीका लागि 'इमर्जेन्सी' सेवा भने हप्ताको सातै दिन २४ सै घण्टा सुचारु रहने मन्त्रालयले स्पष्ट पारेको छ।
आइतबार बिदा हुने भएपछि सो दिन तय गरिएका शल्यक्रिया (Operation) तथा अन्य परीक्षणहरूलाई बिरामीको अनुकूलता हेरेर नयाँ तालिकामा मिलाउन अस्पतालहरूलाई निर्देशन दिइएको छ। बिदाको दिनमा बिरामीले उपचार नपाएर सास्ती भोग्नु नपरोस् भन्नका लागि एम्बुलेन्स सेवालाई हरदम तयारी अवस्थामा राख्न र आवश्यक परेमा तुरुन्तै अर्को अस्पतालमा रेफर गर्ने संयन्त्रलाई प्रभावकारी बनाउन भनिएको छ। यसका साथै, कुन सेवा कति बेला उपलब्ध हुन्छ भन्ने जानकारी सर्वसाधारणले सजिलै पाउने गरी अस्पतालको सूचना पाटी र वेबसाइटमा राख्न अनिवार्य गरिएको छ।स्वास्थ्य मन्त्रालयले 'अस्पताल सुधार कार्यविधि, २०८२' लाई कडाइका साथ पालना गर्न सबै स्वास्थ्य संस्थाहरूलाई आग्रह गरेको छ।
दुई दिने बिदाले स्वास्थ्यकर्मीहरूको कार्यबोझ कम भई उनीहरूको मनोबल बढ्ने र सेवाको गुणस्तरमा सुधार आउने अपेक्षा गरिएको छ। आगामी दिनमा जनशक्ति र संगठनको नयाँ सर्भे गरी स्वास्थ्य सेवालाई अझ आधुनिक, वैज्ञानिक र प्रभावकारी बनाउँदै लैजाने प्रतिबद्धता समेत सरकारले जनाएको छ।
