हिजो (१३ अप्रिल, २०२६) हैदराबादको राजीव गान्धी अन्तर्राष्ट्रिय स्टेडियममा भएको आईपीएल २०२६ को २१औँ खेलमा सनराइजर्स हैदराबाद (SRH) ले राजस्थान रोयल्स (RR) लाई ५७ रनको फराकिलो अन्तरले पराजित गरेको छ। पहिले ब्याटिङ गरेको हैदराबादले कप्तान इशान किशनको विस्फोटक ९१ रन (४४ बल) को मद्दतले २० ओभरमा ६ विकेट गुमाएर २१६ रनको विशाल योगफल तयार पारेको थियो। किशनले आफ्नो इनिङ्समा ८ चौका र ६ छक्का प्रहार गरेका थिए भने हेनरिक क्लासेनले पनि ४० रनको महत्त्वपूर्ण योगदान दिए। राजस्थानका लागि जोफ्रा आर्चरले २ विकेट लिए पनि अन्य बलरहरू निकै महँगो सावित भए।२१७ रनको लक्ष्य पछ्याएको राजस्थान रोयल्स १९ ओभरमा १५९ रनमै अलआउट हुन पुग्यो। राजस्थानको ब्याटिङ लाइनअपलाई ध्वस्त पार्न हैदराबादका डेब्यु खेलाडी प्रफुल हिङ्गे र साकिब हुसेनले घातक बलिङ गरे। साकिबले ४ ओभरमा २४ रन दिएर ४ विकेट लिए भने म्यान अफ द म्याच घोषित प्रफुलले ३४ रन खर्चेर ४ विकेट चट्काए। राजस्थानका लागि डोनोभन फरेराले ६९ र रविन्द्र जडेजाले ४५ रन बनाए पनि टोलीलाई हारबाट जोगाउन सकेनन्। यो जितसँगै हैदराबादले जारी सिजनमा आफ्नो बलियो उपस्थिति जनाएको छ भने राजस्थानले यस सिजनको पहिलो हार बेहोरेको छ।