इलाम कारागारबाट प्रशासनले स्रोत नखुलेको ४८ लाख रुपैयाँभन्दा बढी नगद बरामद गरेको छ। कारागारभित्र अवैध रूपमा ठूलो रकम राखिएको भन्ने गोप्य सूचनाका आधारमा जिल्ला प्रशासन कार्यालयका अधिकृत र प्रहरीको संयुक्त टोलीले आकस्मिक छापा मारेको थियो। कारागारको ७ नम्बर कोठामा गरिएको सो छापा मार्ने क्रममा २४ हजार भारतीय रुपैयाँसहित उक्त रकम फेला परेको हो। यो रकम कारागारका नाइके, चौकीदार र अर्का एक कैदी गरी तीन जनाबाट बरामद गरिएको प्रशासनले जनाएको छ।प्रमुख जिल्ला अधिकारी लक्ष्मण ढकालले कारागारभित्र रहेका कैदीहरूसँग यति धेरै रकम कसरी र कुन माध्यमबाट जम्मा भयो भन्ने विषयमा गम्भीर अनुसन्धान अगाडि बढाइने जानकारी दिएका छन्। उनले बरामद गरिएको रकमको वैधानिक स्रोत पुष्टि भएमा कानुनबमोजिम फिर्ता गरिने र स्रोत नखुलेमा आवश्यक कानुनी कारबाही गरिने बताएका छन्।